Innlent

Ögmundur telur varhugavert að taka upp vegatolla

Frá fundi Ögmundar með fulltrúum vinnumarkaðarins og atvinnulífsins í innanríkisráðuneytinu. Mynd/Baldur
Frá fundi Ögmundar með fulltrúum vinnumarkaðarins og atvinnulífsins í innanríkisráðuneytinu. Mynd/Baldur

Innanríkisráðherra telur varhugavert að taka upp vegatolla og segir gríðarlega andstöðu við það meðal fólksins í landinu. Hann fundaði með fulltrúum vinnumarkaðarins og atvinnulífsins í dag sem saka ríkið um forsendubrest í tengslum við nýju kjarasamningana.

Fulltrúar atvinnulífsins hafa frest fram á þriðjudag til að segja upp kjarasamningunum sem skrifað var undir í maí. Ríkisstjórnin er sökuð um forsendubrest þar sem ekki hafi verið staðið við gefin fyrirheit, til dæmis í samgöngumálum. Innanríkisráðherra segir málið snúast um upptöku vegatolla.

„Frá því farið var að ræða þessi mál fyrir tveimur árum hafa skipast veður í lofti því nú er risin gríðarleg andstaða gegn vegatollum af þessu tagi. Ég fékk yfir 40 þúsund undirskriftir frá Félagi íslenskra bifreiðaeigenda safnaði á örfáum dögum. Það eru um 20% kosningabærra manna á landinu,“ segir Ögmundur.

Að mati atvinnurekenda væri hægt að fjármagna flýtiaðgerðir í samgöngumálum með vegatollum. Ögmundur segir hins vegar mikilvægt að taka mark á vilja fólksins.

Spurður um sína afstöðu segir Ögmundur: „Mín skoðun er að hlusta á fólkið í landinu. Þeir sem eiga að borga brúsann verða að hafa eitthvað að segja.“

Ein af forsendunum fyrir því að kjarasamningur myndu halda til þriggja ára var að ráðist yrði í þessar flýtiagðerðir. Aðspurður segir Ögmundur kjarasamninganna ekki vera í óvissu. „Nei alls ekki. Ég lít ekki svo á. Það var ákveðið í tengslum við þessa kjarasamninga að við færum yfir þessi mál og við munum gera það hér. Ég hef fengið sérfræðinga til að sitja fundinn með okkar og við munum halda áfram þeirri vinnu okkar við að ná markmiðum okkar um að skapa sem flest störf og gera samgöngukerfið öruggara og betra,“ segir Ögmundur.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.