Milljarðatap Landsbankans á dómi Hæstaréttar

Hæstiréttur staðfesti í dag úrskurð Héraðsdóms Reykjavikur um að lán sem fyrirtækið Motormax tók hjá Landsbanka Íslands hefði verið ólöglegt gengistryggt lán.

Landsbankinn stefndi þrotabúi Motormax vegna láns sem fyrirtækið tók hjá bankanum á árinu 2007. Þegar Motormax varð gjaldþrota árið 2009 gerði bankinn um 270 milljóna króna kröfu í búið vegna lánsins. Skiptastjóri þrotabúsins hafnaði hins vegar kröfunni á þeirri forsendu að um ólögmætt gengistryggt lán hefði verið að ræða. Hann samþykkti hins vegar kröfu að upphæð 165 milljónir króna.

Landsbankinn féllst ekki á þessar málalyktir og stefni þrotabúinu fyrir Héraðsdómi Reykjavíkur. Héraðsdómur féllst ekki á kröfu Landsbankans. Landsbankinn áfrýjaði þá málinu til Hæstaréttar, sem staðfesti úrskurð Héraðsdóms Reykjavíkur.

Málið varðar milljarðahagsmuni. Eftir að dómur féll í héraði sendi Landsbankinn frá sér yfirlýsingu og sagði að dómurinn myndi kosta bankann um 16 milljarða króna ef hann yrði staðfestur.

Sjö manna Hæstiréttur klofnaði í málinu. Þrír dómarar töldu að um erlent lán væri að ræða. Meirihlutinn, eða fjórir dómarar, töldu hins vegar að um ólöglegt gengistryggt lán væri að ræða. Þetta er í fyrsta sinn í sjö ár sem sjö dómarar skipa Hæstarétt. Það þykir til marks um þá hagsmuni sem eru í málinu.