Hæstiréttur troðfullur í gengisdómamáli

Áhorfendapallar í sal Hæstaréttar Íslands voru fullir þegar að sjö manna dómur kom þar saman í fyrsta sinn í sjö ár klukkan eitt í dag. Þar tókust á lögmaður Landsbanka Íslands og lögmaður þrotabús Motormax.

Gríðarlegir hagsmunir eru í húfi í málinu, en eins og Vísir hefur áður greint frá var búið að flytja málið fyrir fimm manna dómi þegar ákveðið var að endurflytja það fyrir fullskipuðum Hæstarétti.

Í málinu er tekist á um það hvor lán sem Motormax tók árið 2007 hafi verið erlent eða hvort það hafi verið íslenskt gengistryggt lán. Gengistryggð íslensk lán eru ólögleg samkvæmt dómi Hæstaréttar frá því 16. júní í fyrra. Komist rétturinn að þeirri niðurstöðu að lánið sé erlent er höfuðstóll lánsins um 270 milljónir. Þrotabú Motormax hefur hins vegar samþykkt kröfu Landsbankans að upphæð um 160 milljónir vegna lánsins.

Aðalsteinn Jónasson, lögmaður Landsbankans, sagði að lánið hefði verið skilgreint sem erlent lán í lánasamningum. Lánið hefði verið greitt út í erlendri mynt en bankinn hefði síðan selt erlendu myntina fyrir íslenskar krónur og lagt krónurnar inn á tékkareikning Motormax. Lántakandinn hefði sjálfur haft val um það hvort hann myndi fá erlendu myntina greidda inn á gjaldeyrisreikning eða hvort hann myndi fá lánið í krónum.

Þorsteinn Einarsson, lögmaður Motormax, lagði áherslu á að Motormax hefði aldrei fengið erlenta mynt afgreidda. Fyrirtækið hefði einungis fengið íslenskar krónur. „Erlendir peningar gengu ekki á milli aðila. Því er ekki hægt að komast að þeirri niðurstöðu að lánið hafi verið í erlendri mynt," sagði Þorsteinn fyrir dómnum.

Þorsteinn sagði líka að fyrir lægi að í lánasamningum hefði lánsfjárhæð aldrei verið tiltekin í erlendri mynt heldur einungis í íslenskum krónum. Það sé þó frumskilyrði að lánsfjárhæðin sé tiltekin í erlendri mynt, eigi lánið að teljast erlent.

Þegar dæmt var í Motormaxmálinu í Héraðsdómi Reykjavíkur sendi Landsbanki Íslands frá sér yfirlýsingu þar sem fram kom að dómurinn myndi kosta bankann um 16 milljarða ef hann yrði staðfestur í Hæstarétti.

Málið hefur nú verið lagt í dóm og verður dómur kveðinn upp innan þriggja vikna.