Illa rökstudd yfirhylming

Saving Iceland segir skýrslu Ríkislögreglustjóra um mál breska njósnarans Marks Kennedys illa rökstudda yfirhylmingu og furðar sig á að Ögmundur Jónasson innanríkisráðherra hyggist sætta sig við skýrsluna. Hreyfingin vill nýja rannsókn á málinu.

Eftir að fregnir bárust um að breskur lögreglumaður, Mark Kennedy, hefði laumað sér inn í raðir Saving Iceland, líkt og annarra samtaka víða um heim, kallaði innanríkisráðuneytið eftir upplýsingum frá ríkislögreglustjóra um vitneskju þeirra um veru Mark á Íslandi.

Embætti ríkislögreglustjóra sendi síðan frá sér skýrslu fyrr í vikunni, upp á 19 síður, en segja má að kjarni hennar sé að ríkislögreglustjóri geti ekki svarað því hvort flugumaðurinn Mark Kennedy hafi verið á Íslandi með vitund og í samvinnu við lögreglu hér á landi. Í skýrslunni er til að mynda margítrekað að lögreglu sé óheimilt að miðla trúnaðarupplýsingum, eins segir að lögreglu sé heimilt að nota flugumenn - en að eftir yfirferð gagna segir embættið að EKKI sé hægt að skera úr um hvort Mark Kennedy hafi verið hér á landi í samvinnu við lögreglu. Þó staðfestir skýrslan að trúnaðarupplýsingar um mótmæli Saving Iceland hafi borist lögreglu frá innlendum og erlendum upplýsingagjöfum.

Saving Iceland hefur sent frá athugasemdir við skýrsluna undir yfirskriftinni - Undanbrögð og yfirhylmingar með blessun ráðherra.  Þar segir að alvarlegasti meinbugur skýrslunnar sé að þar sé vikist undan þeirri ábyrgð sem henni hafi verið ætlað að axla. Með því að vísa til yfirferðar gagna gætu öll yfirvöld vikið sér undan upplýsingaskyldu með því að eyða gögnum eða búa ekki til gögn um það sem fram fer. Þetta sé óásættanleg niðurstaða.

Þá gagnrýnir Saving Iceland að ekki hafi verið haft samband við einstaklingar sem störfuðu með hreyfingunni heldur byggi lögregla á frásagnir í breska blaðinu The Guardian sem séu fullar af rangfærslum.

Einnig segir hreyfingin að skýrslan sé hrópandi dæmi um þá meinsemd íslenskra yfirvalda að beita sér gegn pólitísku andófi eins og glæpasamtökum og segir að glæpavæðing andófs sé tilræði við lýðræðið.

Þá mælist Saving Iceland til þess að Ögmundur Jónasson sendi skýrsluna aftur til sinna heimahúsa, að öðrum kosti sé brýnt að mál breska njósnarans verði rannsakað af óháðum aðilum sem hafi ekki hagsmuna að gæta líkt og embætti ríkislögreglustjóra.