Þór Saari: Takk fyrir Össur

„Það er oft talað um að lítið hafi breyst og það finnst mér sjálfum oftar en ekki. Þetta hefði þó hins vegar aldrei gerst í ríkisstjórn þar sem sjálfstæðismenn réðu ferðinni og er enn ein ástæðan fyrir því, ásamt um þúsund öðrum, að þeim verði haldið frá völdum hér á landi í a.m.k. tíu ár,“ segir Þór Saari, þingmaður Hreyfingarinnar, um afsökunarbeiðni Össurar Skarhéðinssonar, utanríkisráðherra, á þingfundi í dag.

Þar baðst Össur afsökunar á framgöngu íslenskra stjórnvalda gagnvart Falun Gong liðum sem ætluðu að koma hingað til lands árið 2002 í tengslum við heimsókn þáverandi Kínaforseta. Össur sagði auk þess menn augljóslega hafa farið út fyrir valdsvið sitt.

Þór fjallar um málið í pistli bloggsíðu sinni og gagnrýnir harðlega framferði þáverandi ríkisstjórnar. „Þetta var allt saman gert til að yfirstétt stjórnmála og viðskiptalífs á Íslandi með áðurnefnda prjóna [Davíð Oddsson og Halldór Ásgrímsson] í broddi fylkingar gæti nú nuddað saman lendum í friði með forsætisráðherrra Kína sem var hér í opinberri heimsókn.“ Þá bætir Þór við fróðleiksmola og rifjar upp að sá embættismaður í dómsmálaráðuneytinu sem framfylgt hafi áður nefndum skipunum og tryggt árangur þeirra sé Stefán Eiríksson, núverandi lögreglustjóri á höfuðborgarsvæðinu.

Þór endar skrifin á að þakka Össuri sérstaklega fyrir afsökunarbeiðnina. „Þetta var vel gert,“ segir Þór í pistlinum sem hægt er að skoða hér.