Lokað í Bláfjöllum fram á haust

Bláfjöllum hefur nú verið lokað þannan veturinn. Í tilkynningu á heimasíðu skíðasvæðisins er skíða- og brettafólki þakkað fyrir ágætan vetur þrátt fyrir að veðrið hafi nokkuð spillt fyrir, sérstaklega í mars og apríl. „Þó nægur snjór hefði verið þá var veðurfarið okkur óhagstætt og sem dæmi þá náðist ekki að opna nema eina heila helgi eftir áramót."

Þá segir að flestir opnunardagar hafi verið stakir eða með lítilli samfellu og kom það niður á þeim gestafjölda sem annars sækir svæðið. Í heild var svæðið opið í 63 daga þennan veturinn og voru gestir 46 þúsund. Þá eru gönguskíðamenn þó ekki taldir með.