Bætur hækka í samræmi við kjarasamningana

Stjórnvöld munu endurskoða bætur almannatrygginga með hliðsjón af niðurstöðum kjarasamninganna, þannig að lífeyrisþegar og atvinnulausir njóti hliðstæðra kjarabóta og um verður samið í kjarasamningunum. Þetta kemur fram í yfirlýsingu ríkisstjórnarinnar vegna kjarasamninganna sem skrifað var undir í dag.

Jóhanna Sigurðardóttir forsætisráðherra og Steingrímur J. Sigfússon fjármálaráðherra kynntu yfirlýsinguna á blaðamannafundi í Alþingishúsinu eftir að skrifað var undir kjarasamningana. Þetta ákvæði í yfirlýsingunni var eitt af áhersluatriðum Alþýðusambands Íslands Eftir því sem Vísir kemst næst þýðir þetta ákvæði að bætur í almannatryggingakerfinu gætu hækkað um allt að 20% á því þriggja ára tímabili sem kjarasamningarnir ná til.

Eins og fram hefur komið mun verðtrygging  persónuafsláttar verða lögfest og mun persónuafsláttur hækka samkvæmt því í ársbyrjun 2012. Þar til viðbótar munu stjórnvöld í samráði við aðila vinnumarkaðarins skoða möguleika á hækkun krónutölu persónuafsláttar eða ígildi hennar í formi lækkunar skatthlutfalls á lægsta skattþrepi frá árslokum 2013.