Freistandi að klífa hraun

Leikfangaframleiðandinn Krumma ehf. kynnti nýja vörulínu í Listasafni Reykjavíkur á föstudaginn. Nýja línan kallast Krumma Flow og sækir innblástur sinn til íslenskrar náttúru.

"Leiktækin eru byggð á flæðinu í náttúrunni, skriðjöklum, vatni og rennandi hrauni, öllu sem hefur áhrif á mótun náttúrunnar," útskýrir Dóra Birna Sigurjónsdóttir, markaðsstjóri Krumma.

"Það er alltaf freistandi að klifra í hrauni en það er ekki öruggt. Nú hefur okkur tekist að gera hraun bæði öruggt og skemmtilegt en leiktækin hafa áferð hrauns og eru jafn spennandi en foreldrarnir geta verið rólegir," segir Dóra og tekur fram að öll leiktæki Krumma séu öryggisvottuð af Dansk Technologisk Institute með tilliti til evrópsks öryggisstaðals EN1176.

Leiktækin eru ætluð börnum frá sex ára aldri og upp úr. Aðalhönnuðir að baki línunnar eru Jenný Ruth Hrafnsdóttir, verkfræðingur og framkvæmdastjóri Krumma ehf., og Hrafn Ingimundarson, vélaverkfræðingur og eigandi fyrirtækisins.

Leiktækin eru ætluð á opin svæði svo sem tjaldstæði, almenningsgarða og skólalóðir. Þau eru framleidd af Krumma en formin eru fræst út í þétt frauðplast sem síðan fær sérstaka yfirborðsmeðhöndlun til að líkja eftir áferð hrauns.

"Þessi tæki líta ekki út fyrir að vera leiktæki og eru ólík öllu því sem við höfum gert áður," segir Dóra. "Við erum ánægð með útkomuna og sjáum fyrir okkur að þróa línuna áfram. Við eigum inni fullt af góðum hugmyndum."

heida@frettabladid.is