Í faðmi fræga fólksins

Enginn vinningshafanna veit fyrirfram hver vinnur því það á að koma á óvart og þannig vil ég líka njóta þess," segir Hera Ólafsdóttir, framkvæmdastjóri Eddunnar sem verður sýnd í beinni útsendingu frá Íslensku óperunni á Stöð 2 og hér á Vísi í kvöld.

"Ég hlakka til og góð tilfinning að sjá hátíðina verða að veruleika eftir langan undirbúning," segir Hera sem reiknar með fullkomnu spennufalli þegar hátíðahöldunum lýkur í kvöld, en hún hefur ekki enn valið sér kjól fyrir kvöldið.

"Allir munu mæta í sínu fínasta pússi svo ég þarf að finna eitthvað látlaust og flott, en þó ekki svo fínt að ég skyggi á stjörnurnar, sem ég gæti ósköp auðveldlega, en þetta er jú þeirra dagur," segir hún hláturmild og hress.

Að verðlaunaafhendingu lokinni flyst samkoman yfir á Sólon þar sem fræga fólkið gleðst áfram. "Þar verða margir sem fagna og eflaust einhverjir vonsviknir, en þetta er fyrst og fremst uppskeruhátíð kvikmyndagerðarfólks og þeirra stund til að fagna því sem vel var gert á síðasta ári," segir Hera sem mörgum finnst trúlega öfundsverð að lenda mitt í partíhringiðu fræga fólksins.

"Þetta er auðvitað skemmtilegasta fólk landsins og skapandi eftir því, en því miður er gleðskapurinn lokaður því fólkið þarf að fagna í friði," útskýrir Hera sem á morgun planar að liggja með tærnar upp í loft og hlaða batteríin heima.

"Mér finnst voða gott að borða morgunmat yfir dagblöðunum í rúminu og leyfa tímanum að hafa sinn gang á sunnudagsmorgnum. Það er svo mikilvægt að kunna að slaka á heima og rembast ekki um of við stífa dagskrá í helgarfríinu."

thordis@frettabladid.is