Peter Habeler með fyrirlestur um háfjallagöngur

Peter Habeler, einn frægasti fjallgöngumaður allra tíma, verður heiðursgestur og fyrirlesari á ráðstefnu 66°Norður og Félags Íslenskra Fjallalækna um háfjallagöngur sem verður haldin í Háskólabíói á morgun, miðvikudaginn 26. janúar kl. 20.

Habeler er án efa frægastur fyrir að hafa náð toppi Everest fyrstur manna án súrefnis ásamt félaga sínum Reinhold Messner. Afrek þeirra þótti einstakt og vakti heimsathygli, enda höfðu margir vísindamenn talið það lífeðlisfræðilega ómögulegt að ná tindinum án viðbótarsúrefnis. Með afreki sínu brutu þeir félagar blað í sögu fjallaklifurs og háfjallalæknisfræði. Síðan lagði Habeler að baki marga af hæstu tindum heims og sló hraðamet á torfærum klifurleiðum eins og norðurvegg Eiger.

Habeler mun í fyrirlestri sínum á ráðstefnunni segja frá göngunni frægu á Everest árið 1978 og persónulegri reynslu sinni af því að halda lífi í hæð sem er flestum lífverum ofviða.

Aðgangur á fyrirlesturinn er ókeypis og eru allir velkomnir.