Ekki vísbendingar um frekari óróa

Jarðskjálftahrina varð í Geitlandsjökli í sunnanverðum Langjökli um klukkan átta í morgun. Jarðskjálftahrinan stóð yfir í um 15 mínútur og mældust stærstu skjálftarnir rúmlega þrjú stig á richter. Sigþrúður Ármannsdóttir, landfræðingur á Veðurstofu Íslands, segir skjálftana þó ekki hafa verið marga eða um tíu talsins.

Um 20 skjálftar hafa mælst á þessu svæði frá miðnætti en flestir þeirra voru smáir. Þrír mældust þó yfir þrjá á richter og fundust þeir meðal annars í Húsafelli.  „Við fengum tvær tilkynningar frá sumarbústaðaeigendum í Húsafelli. Þeir fundu fyrir þessum stærstu.“

Einn vægur jarðskjálfti varð svo upp úr klukkan níu í morgun en síðan þá hefur allt verið með kyrrum kjörum á svæðinu, sem er algengt jarðskjálftarsvæði. „Við fáum oft skjálfta í Geitlandsjökli. Það var smá hrina í síðustu viku. Þannig að þetta er ekki óþekkt svæði,“ segir Sigþrúður.

Skjálftahrinan gefur ekki vísbendingar um frekari óróa. „Ekki er það að sjá enn sem komið er,“ segir Sigþrúður.