Þeir ríkustu í Hollywood

Kvikmyndaframleiðandinn og -leikstjórinn Michael Bay græddi mest allra í Hollywood á síðasta ári samkvæmt rannsókn tímaritsins Vanity Fair, eða um sextán milljarða króna.

Þrátt fyrir að minna fjármagn hafi flögrað um í Hollywood í fyrra en oft áður virðist það ekki hafa haft áhrif á toppana í kvikmyndaborginni.

Samkvæmt útreikningum Vanity Fair, sem eru byggðir á áætluðum tekjum, græddi Michael Bay um 9,6 milljarða króna á hasarmyndinni Transformers: Revenge of the Fallen, bæði fyrir leikstjórn sína og framleiðslu. Alls græddi myndin tæpa 107 milljarða í miðasölu víðs vegar um heiminn, þrátt fyrir að hún hafi fengið misjafna dóma gagnrýnenda. Bay fékk einnig í vasann um 3,6 milljarða fyrir DVD-sölu myndarinnar og um 1,6 milljarða fyrir leikfangasölu og gjöld tengd höfundarrétti hans. Alls námu tekjur hans um 16 milljörðum bæði fyrir Transformers og önnur verkefni sem hann kom nálægt, sem eru ekki slæm árslaun hjá einum og sama manninum.

Framleiðendur og leikstjórar eru einnig í næstu fjórum sætum á eftir Bay, eða þeir Steven Spielberg, Roland Emmerich, James Cameron og Todd Philips. Spielberg fékk tæpa 10,8 milljarða á síðasta ári, þar af um 2,5 milljarða fyrir að framleiða og leikstýra nýrri ævintýramynd um teiknimyndahetjuna Tinna sem kemur út á næsta ári. Emmerich græddi tæpa níu milljarða á stórslysamyndinni 2012 sem var sýnd síðasta sumar en alls þénaði hún tæpa 96 milljarða króna. Cameron þénaði um 6,4 milljarða á stórmyndinni Avatar, sem er þegar orðin tekjuhæsta mynd allra tíma, og Todd Phillips fékk um 5,6 milljarða í vasann fyrir hinn óvænta gamansmell The Hangover.

Tekjuhæsti leikarinn á listanum var sjálfur Harry Potter, eða Daniel Radcliffe, með svipaðar tekjur og Phillips, eða um 5,2 milljarða. Næstir á eftir honum komu leikaranir Ben Stiller og Tom Hanks. -fb