Slökkviliðsmenn funda með viðsemjendum á morgun

Samninganefndir Landssambands slökkviliðs- og sjúkraflutningamanna og Launanefndar sveitarfélaga ætla að koma saman til fundar á morgun og reyna að ná lendingu í kjaradeilu sinni. Samningar slökkviliðs- og sjúkraflutningamanna hafa verið lausir í heilt ár.

Takist ekki nýir samningar á morgun hefst enn ein lota verkfalls slökkviliðs- og sjúkraflutningamanna á föstudaginn. Verkfallið verður þá 16 klukkustunda langt eins og á síðasta föstudag. Núna bætist hins vegar við ótímabundið yfirvinnubann. Sverrir Björn Björnsson, formaður Landssambands slökkviliðs- og sjúkraflutningamanna, segir að það feli meðal annars í sér að hugsanlega verði ekki hægt að fullmanna vaktir. Þá verði engir sjúkraflutningar út fyrir þau umdæmi sem slökkviliðs- og sjúkraflutningamenn vinni í.

Ef af verkfallinu verður á föstudaginn er það þriðja lota verkfallsins en sú fysta var átta klukkustunda löng.