Greiðslufyrirkomulag heilbrigðisstarfsmanna kannað

Heilbrigðisráðherra ætlar að láta kanna fyrirkomulag á greiðslum heilbirgðisstarfsmanna. Tilefnið er launafyrirkomulag yfirlæknis á Ísafirði en ráðherra segir að þar virðist vinnuskyldunni hafi verið skipt í tvennt, annars vegar hefðbundin laun fyrir fastavinnuskyldu og hins vegar verktakagreiðslur. Athyglisvert sé ef menn eru í margskonar tengslum við kerfið.

Álfheiður Ingadóttir heilbrigðisráðherra segir heilbrigðisráðuneytið líta svo á að óeðlilegt hafi verið af Fjórðungssjúkrahúsinu á Ísafirði að borga yfirlækni þar fyrir bakvaktir í gegnum einkahlutafélagið Skurðlækninn ehf. DV fjallar um málið í dag og segir að kallað hafi verið eftir frekari upplýsingum því tengdu.

Álfheiður Ingadóttir heilbrigðisráðherra segir málið ekki lúta að einstaklingnum heldur greiðslufyrirkomulagi í heilbirgðiskerfinu.

Fréttastofa hefur heimildir fyrir því að stofnanir hafi talið sig haft hafa hag af tvískiptingu greiðslnanna og það hafi verið gert með samþykki heilbrigðisráðuneytisins. Álfheiður segir að sér sé ekki kunnugt um hvort svo sé en það sé eitt þeirra atriða sem verði kannað.

Álfheiður segir hugsanlegt að tvenns konar ráðningarferli líkt og hefur verið á Ísafirði hafi viðgengist á fleiri stöðum á landinu.