Vegagerðin að hefja lagfæringar á varnargarðinum

Ragnheiður Hauksdóttir landvörður í Húsadal segir að Vegagerðin hafi nú þegar sent stórvirk vinnutæki til þess að gera lagfæringar á veginum inn í Þórsmörk en Markarfljótið rauf veginn á kafla fyrr í dag.

Ragnheiður segir að í fyrra hafi Vegagerðin sett um varnargarð á svæðinu til þess að reyna að koma í veg fyrir að fljótið færi yfir veginn en sá garður hefur nú gefið sig. Hún fór á staðinn fyrr í dag og segir að áin þræði sig eftir veginum á um hundrað metra kafla. Að sögn Ragnheiðar er eldfjallaösku um að kenna en hún myndi leðju í ánum á svæðinu sem fari þá að hegða sér óútreiknanlega.

Lögreglan á Hvolsvelli er nú á leið á staðinn til þess að meta aðstæður en áætlunarbílstjórar sem komið hafa á svæðið segja lögreglu að vegurinn sé orðinn mjög erfiður yfirferðar og gæti verið hættulegur þeim sem ekki séu vanir. Því er varað við ferðum inn í Þórsmörk uns garðurinn hefur verið lagfærður.

Hjá Veðurstofunni fengust þær upplýsingar að ekki sé um flóð að ræða. Miklir vatnavextir hafa verið í öllum ám á svæðinu undanfarið en að rennslið í fljótinu sé ekkert meira í dag en undanfarna daga.