Lögreglan sendi kanadískri fjölskyldu þýfi

Kanadísk hjón og dóttir þeirra urðu fyrir óskemmtilegri reynslu þegar þau heimsóttu Ísland fyrr í sumar. Brotist var inn í bíl þeirra þegar þau skoðuðu sig um í Reykjavík og úr honum var stolið ýmsum búnaði, meðal annars bakpokum þeirra og GPS-tæki. Fram kemur á vef lögreglunnar að með hjálp heiðvirðra borgara hafi lögreglumönnum tekist að endurheimta mest af búnaði þeirra og koma honum aftur í réttar hendur áður en Íslandsheimsókninni lauk.

GPS-tækið var þar undanskilið en nú hefur líka tekist að koma því til skila en tækið var á dögunum sent til eigenda sinna í Kanada. Það fannst nokkru síðar við húsleit hjá manni sem hefur áður komið við sögu hjá lögreglunni á höfuðborgarsvæðinu.

Í framhaldinu var GPS-tækinu komið í munavörslu embættisins en þar mundi starfsmaður eftir innbrotinu í bíl Kanadamannanna og áttaði sig á því að um sama tæki var að ræða. Hann setti sig í samband við fólkið í Kanada og nú hefur GPS-tækið komist aftur í réttar hendur eins og áður sagði. Að sögn lögreglu var kanadíska fjölskyldan afar ánægð með vinnubrögð lögreglunnar sem vonar að næsta heimsókn fjölskyldunnar til Íslands verði áfallalaus.