Hagnaður ÁTVR þrefaldast

Hagnaður Áfengis- og tóbaksverslunar ríkisins (ÁTVR) í fyrra nam rúmum 1,3 milljörðum króna. Árið 2008 var hagnaðurinn 447 milljónir króna.

Sigrún Ósk Sigurðardóttir, aðstoðarframkvæmdastjóri ÁTVR, segir þennan aukna hagnað skýrast af breyttum lögum um álagningu á áfengi og tóbaki sem samþykkt voru í árslok 2008. „ÁTVR greiddi 960 milljónir til ríkissjóðs eftir síðasta ár og við munum greiða milljarð í ár,“ segir Sigrún.

Eggert Ísdal, sölustjóri áfengis hjá umboðsfyrirtækinu Rolf Johansen & Company, segir tekjuaukningu ÁTVR eingöngu tilkomna vegna aukinnar álagningar. „Skattahækkanir hafa ekkert með þetta að gera,“ segir Eggert. Áfengisgjöld og skattar séu til staðar þegar ÁTVR kaupi inn, svo öll umframálagning sé í þeirra höndum. Álagning, eftir skatta og gjöld, á sterku áfengi hafi hækkaði um 73 prósent í byrjun árs 2009 og um 38 prósent á léttvíni og bjór.

Örn Stefánsson, innkaupastjóri ÁTVR, segir þennan stóraukna hagnað koma til af tvennu. Annars vegar af því að álagning á áfengi í kjarnasölu og reynslusölu hafi verið samræmd og hins vegar vegna hækkunar á áfengisgjöldum.

„Áfengisgjöld hækkuðu mjög mikið á stuttum tíma,“ segir Örn. „Álagningin hjá ÁTVR hækkaði þó mest á sterku áfengi en þar er sala minnst.“

Friðjón Hólmbertsson, framkvæmdastjóri drykkjarvörusviðs Ölgerðar Egils Skallagrímssonar, segir hækkunina hafa mikil áhrif á viðskipti í landinu. „ÁTVR er að leggja þetta ofan á hækkun áfengisgjalds,“ segir Friðjón. „Verslanirnar sjálfar eru að taka mun meiri hagnað til sín, vegna þess að álagningin er umfram öll gjöld og skatta.“

Áfengisverð hefur hækkað um 57 prósent að meðaltali frá byrjun árs 2008. Verð hefur þó lækkað örlítið frá því það var hæst í janúar 2010. Verð á tóbaki hefur þróast í svipuðum skrefum og áfengið, hefur hækkað um 49 prósent frá byrjun árs 2008. -sv