Eldur í Byko í Garðabæ

Allt tiltækt lið slökkviliðs höfuðborgarsvæðisins var sent að húsnæði Byko í Kauptúni í Garðabæ í nótt eftir að tilkynnt var um eld í húsinu. Tilkynningin barst skömmu fyrir klukkan fjögur og gekk vel að slökkva eldinn, samkvæmt upplýsingum sem fengust hjá varðstjóra. Ekki var mikinn eld að ræða en svo virðist sem að kviknað hafi í kaffivél í mötuneyti starfsmanna.

Talsverður reykur barst um húsnæðið, meðal annars í verslunina, og voru slökkviliðsmenn nokkurn tíma að reykræsta. Að sögn varðstjóra lítur ekki út fyrir að miklar skemmdar hafi orðið á innanstokksmunum og húsnæðinu.

Verslun Byko í Garðabæ verður opinn í dag.

Talsverður erill var hjá slökkviliðsmönnum í nótt og í gærkvöldi þar sem farnir voru um 30 sjúkraflutningar.