Ölvaður ók of hratt

Karlmaður á þrítugsaldri var í nótt sviptur ökuréttindum til bráðabirgða eftir að lögreglan á Selfossi handtók hann fyrir ölvunarakstur. Að auki ók hann á 70 km. hraða í íbúðahverfi þar sem hámarkshraðinn er 30 km. Maðurinn á von á töluvert hárri sekt fyrir uppátækið, að sögn lögreglu.

Nóttin var erilsöm hjá lögreglunni á Selfossi en um helgina fóru fram bæjarhátíðar í Hveragerði og á Eyrarbakka og þá var fjölmennur dansleikur á Selfossi í gær. Skemmtanahald gekk þó að mestu áfallalaust fyrir sig, samkvæmt upplýsingum sem fengust hjá lögreglu.