Mikið stolið úr tjöldum á Þjóðhátíð

Mikið hefur verið um það á Þjóðhátíð í Vestmannaeyjum að verið sé að stela úr tjöldum og jafnvel tjöldunum sjálfum. Samkvæmt upplýsingum frá Lögreglunni í Vestmannaeyjum fór dagurinn í dag mest í það að hjálpa fólki sem hafði týnt hlutum.

Mikil ölvun er á meðal fólks á eyjunni en lögreglan hefur miklar áhyggjur af veðurspánni. „Þegar það verður blautt getur það gerst að fólk verður pirrað og þráðurinn hjá því verður styttri. Þegar fólk er búið að vera ölvað kannski í þrjá daga samfellt þá getur veðrið skipt miklu máli," segir lögreglumaður á vakt.

Hann segir að eyjamenn séu afskaplega kátir og glaðir með unga fólkið á eyjunni. Allir séu svo ánægðir með ungu krakkana hvað þeir haga sér vel.