Stofninn minni en áætlað var

Rjúpnaveiðimenn veiddu á síðasta ári 94.000 fugla, 23.000 fleiri en Náttúrufræðistofnun Íslands, NÍ, ráðlagði. Rjúpnaveiðimenn veiddu einnig meira en ráðlagt var árin 2005 og 2006. Þessi umframveiði og gallar í útreikningum á hversu mikið má veiða gera það að verkum að hætta er á ofveiði á rjúpum segir Ólafur K. Nielsen vistfræðingur hjá NÍ í tímaritinu Skotvís.

Útreikningar á stærð stofnsins byggja á gögnum frá Norðausturlandi en fram kemur í greininni að annars staðar á landinu hefur rjúpum fækkað.

Leyft verður að veiða 75.000 fugla á 18 dögum, og er þá miðað við að stofninn telji 850.000 fugla. -sbt