Ekki allir fullir sem hringja inn

„Það eru alls ekki allir blindfullir sem hringja inn en ég hef fundið fyrir því að ég virðist hafa þau áhrif á þjóðina að nú þykir sjálfsagt að fá sér brjóstbirtu upp úr klukkan fjögur þegar þátturinn minn hefst," segir Siggi Hlö útvarpsmaður spurður út í ástand hlustenda sem hringja inn óskalög í þáttinn hans Veistu hver ég var? sem er á Bylgjunni á laugardögum klukkan 16:00 - 18:30.

„Sumir reyndar fara full geyst í safann og þamba og hringja svo þegar svífur á þá," bætir Siggi við.

Hvernig undirbýrðu þáttinn? „Ég skrifa handrit á miðvikudags- eða fimmtudagskvöldum. Þá sit ég við borðstofuborðið heima og fletti upp tónlist og fer í fílinginn. Konan mín hjálpar mér mikið og kemur með mikið af góðum hugmyndum fyrir þáttinn. Í gær vorum við að rifja upp Ronson rúllurnar sem voru til á öðru hverju heimili."

Mætir þú með ennisbandið í útsendingu? „Ég tek þetta alla leið. Hef oft mætt í Don Cano gallanum með maskara og hárið blásið í norður. Maður verður að setja sig í gírinn og ég hef oft pælt í að fá mér Lumumba eða White Russian í útsendingu en held að þá myndi allt fara til fjandans."