Bjóða allri þjóðinni að varðeldi

Skátar bjóða allri þjóðinni að skátavarðeldi við Úlfljótsvatn sem hefst klukkan hálfníu í kvöld. Varðeldurinn markar hápunkt afmælismóts sem stendur núna yfir en íslenskir skátar ásamt gestum frá Bretlandi og Svíþjóð taka þátt í mótinu. Mótið er haldið í tilefni af 100 ára afmæli kvenskátastarfs í heiminum og segir Guðmundur Pálsson, verkefnastjóri hjá Bandalagi íslenskra skáta, að það hafi farið vel fram.

„Við fengum eiginlega meginlandsrigningu frá klukkan tíu í gærkvöldi til klukkan þrjú í nótt þannig að menn flutu hérna út úr tjöldum. Það er auðvitað bara nauðsynlegt fyrir hvern ungan mann og unga stúlku að prófa það einu sinni," segir Guðmundur og tekur jafnframt fram að allt hafi gengið vel og engum orðið meint af rigningunni.

Guðmundur segir að um 400 manns hafi tekið þátt í mótinu og það eigi eftir að bætast í hópinn í kvöld. „Það er byrjað að koma talsvert af gestum nú þegar," sagði Guðmundur þegar Vísir talaði við hann klukkan hálfátta.