„Pabbi, ég sit bara á gólfinu“

Lögreglan á höfuðborgarsvæðinu hafði afskipti af yfirfullri rútu sem var á leið frá Selfossi til Reykjavíkur rétt fyrir hádegi í dag. Tilkynnt var um að minnsta kosti þrír farþegar væru sitjandi á gólfinu. Áhyggjufullur faðir hafði samband við fréttastofu í dag og sagði að strákurinn sinn sem er 11 ára gamall hefði hringt í sig og sagt: „Pabbi, ég sit bara á gólfinu."

Lögreglan hafði afskipti af rútunni þegar hún kom í bæinn. Samkvæmt upplýsingum frá lögreglunni var í fyrstu talið að þarna væri venjulegur strætó á ferð, þar sem farþegar eru tryggðir sem eru ekki í sætum. Síðar hafi komið í ljós að um var að ræða rútu þar sem farþegum er ekki leyfilegt að standa eða sitja á gólfinu. Að sögn varðstjóra er málið í skoðun hjá embættinu en það sé skýrt að ekki sé leyfilegt að fólk sé standandi í rútum. Þeir farþegar eru ekki tryggðir og mikil hætta geti skapast ef eitthvað gerist.

Samkvæmt upplýsingum frá Stætó bs. er málið í skoðun hjá fyrirtækinu og ekki hægt að gefa frekari upplýsingar að svo stöddu.