Alcoa sagt slegið út af borðinu

Standi yfirlýsingar Katrínar Júlíusdóttur iðnaðarráðherra um að tekin verði ákvörðun um uppbygginu á Bakka fyrir 1. október, er ljóst að Alcoa hefur verið útilokað frá henni. Katrín lýsti þessu yfir í Kastljósi á fimmtudag.

„Ég held að öllum sé ljóst að ef það á að taka ákvörðun 1. október er verið að slá okkur út af borðinu," segir Tómas Már Sigurðsson, forstjóri Alcoa á Íslandi. Þá muni ekki liggja fyrir upplýsingar um hve mikil orka sé á svæðinu, hvað kosti að nýta hana og hvenær hægt sé að afhenda hana. Án þeirra upplýsinga sé ekki hægt að fara í verkefnið.

Alcoa hefur unnið að uppbyggingu álvers á Bakka í fimm ár og Tómas segir að fjárfesting fyrirtækisins vegna verkefnisins nemi um tveimur milljörðum króna. Hann segir nefnd um uppbyggingu iðnaðar á svæðinu hafa metið fyrirtækið hæfast um miðjan maí. „Þeir ætluðu að vinna með okkur, en síðan höfum við ekkert heyrt. Þeir sögðust ætla að vera í sambandi."

Katrín sagði í Kastljósinu að hún teldi minni líkur en áður að álver Alcoa rísi á Bakka. Tiltók hún sérstaklega að forsvarsmenn fyrirtækisins hefðu ekki haft samband við ráðherra. Hún kvaðst þó hafa fundið fyrir áhuga fyrirtækisins hér innanlands. „En ég hef ekki fundið þennan áhuga frá hinu erlenda móðurfélagi," sagði hún.

Tómas segir ummælin á misskilningi byggð. „Verkefnið er alfarið í höndum Alcoa á Íslandi. Við berum ábyrgð á rekstri Fjarðaáls og annarri uppbyggingu á Íslandi."

Tómas segir fyrirtækið enn hafa áhuga á verkefninu, þótt vanti upplýsingar sem nauðsynlegar séu til að taka ákvörðun.- kóp