Eyjafjallajökull: Lokun hættusvæða enn í fullu gildi

Almannavarnadeild Ríkislögreglustjóra minnir á að lokanir séu enn í fullu gildi á svæðinu umhverfis eldgosið í Eyjafjallajökli. Í tilkynningu segir að undanfarið hafi verið töluverð ásókn í að komast inn á lokuð hættusvæði í grennd við gosstöðvarnar.

„Þó svo að þessar náttúruhamfarir séu mikið sjónarspil sem áhugavert er að skoða þá er ástæða til að árétta þær hættur sem því geta fylgt. Minnt er á að lokanir sem ákveðnar hafa verið eru enn í fullu gildi samanber kort gefið út 27. apríl 2010."

Þá er bent á að ekki sé vitað með vissu hvaða áhrif umbrotin hafa haft á jökulinn sjálfan. Sprungur geta hafa myndast og vitað er um a.m.k. eina vatnsrás, um 50 metra djúpa á sunnanverðum jöklinum.

„Nú líður senn að því að jökulhaftið milli gígsins á toppi fjallsins og Gígjökuls bresti. Við það munu eitraðar lofttegundir s.s. koltvísýringur (CO2) og brennisteinsvetni (H2S) eiga greiðari leið niður Gígjökul og út á eyrarnar framanvið jökulinn," segir einnig.

Þá er minnt á að í eldgosum sem þessu kemur fyrir að gusthlaup fara niður farvegi eins og Gígjökul þó ekki sé það algengt. „Gusthlaup verða þegar blanda af gasi og fínkorna bergryki mynda lága bólstra yfir gjósandi gígum eða þegar aska hrynur úr ofhlöðnum gosmekki. Gusthlaup fara undan halla og fara hratt yfir svo ástæða er til að forðast hugsanlega farvegi þeirra."