Eðlilegra væri að fá að kjósa um virkjun

Sveitarstjórn Flóahrepps hefur skuldbundið hreppinn til að greiða vel á þriðja hundrað milljóna króna fyrir vatnsveitu verði Urriðafossvirkjun ekki sett á aðalskipulag hreppsins.

„Okkur finnst þetta hreinlega ekki lýðræðislegt,“ segir Svanhvít Hermannsdóttir. Hún skipar fyrsta sætið á lista T-framboðsins, sem er andvígt Urriðafossvirkjun. „Það sem vekur fyrst og fremst undrun okkar er að þetta skuli vera keyrt í gegn mánuði fyrir kosningar, og án allrar umræðu.“

Urriðafossvirkjun er eitt af stóru kosningamálunum í hreppnum, og segir Svanhvít að eðlilegt hefði verið að leyfa íbúum að kjósa um stefnu sveitarfélagsins í þeim málum.

Forsvarsmenn Flóahrepps og Árborgar undirrituðu samning um vatnveitu 26. apríl síðastliðinn. Í samningnum, sem Fréttablaðið hefur undir höndum, kemur fram að hann er óuppsegjanlegur. Komist andstæðingar virkjunarinnar til valda eftir kosningar verða þeir annaðhvort að samþykkja Urriðafossvirkjun eða greiða kostnaðinn við vatnsveituna að fullu.

Vatnsveitan verður hluti af mótvægisaðgerðum Landsvirkjunar vegna Urriðafossvirkjunar. Komist virkjunin á aðalskipulag mun Landsvirkjun því greiða allan kostnað við vatnsveituna. Vatnið mun koma frá Árborg, en vatnsskortur hefur verið í Flóahreppi á þurrkaköflum síðustu sumur.

Þar kemur fram að framkvæmdir verði á þessu ári og því næsta. Kostnaður við vatnsveituna verður 117 milljónir króna á þessu ári. Aðalsteinn Sveinsson, oddviti Flóahrepps, segir að kostnaður á næsta ári verði svipaður, og heildarkostnaður því á bilinu 200 til 300 milljónir króna.

Þetta eru háar fjárhæðir fyrir 600 manna sveitarfélag, segir Svanhvít. Hún vill að rannsakað verði til hlítar hvort hægt sé að bora eftir köldu vatni í sveitar­félaginu og spara með því mikið fé. Aðalsteinn segist ekki viss um að hægt hefði verið að afla sveitarfélaginu vatns með ódýrari hætti, í það minnsta ekki með jafn góðum og öruggum hætti.

Spurður hvers vegna svo umdeild ákvörðun sé tekin aðeins mánuði fyrir kosningar segir Aðalsteinn að örlögin hafi einfaldlega hagað málum þannig. Til hafi staðið að ljúka málinu fyrr, en það hafi ekki tekist.

Sveitarstjórn Flóahrepps hefur enn ekki staðfest samninginn, en hann verður tekinn fyrir á fundi annað kvöld.

brjann@frettabladid.is