Ökumaður tekinn með allt niðrum sig

Karl á þrítugsaldri var stöðvaður við akstur á Breiðholtsbraut í gærmorgun. Afskiptin voru tilkomin vegna þess að ökumaðurinn var að tala í síma án þess að notast við handfrjálsan búnað.

Segja má að ökumaðurinn hafi verið með allt niðrum sig því við frekari skoðun kom líka í ljós að maðurinn hafði þegar verið sviptur ökuleyfi. Að auki reyndist bíllinn vera ótryggður og þá voru ákvæði um skoðun heldur ekki fyrir hendi. Samkvæmt upplýsingum frá lögreglu voru jafnframt röng skráningarnúmer á ökutækinu.

Eftir að þetta hafði allt komið á daginn var bifreiðin fjarlægð af vettvangi og kveikjuláslyklar hennar teknir í vörslu lögreglu.