Á leið til Haítí

Tveir heilbrigðismenntaðir starfsmenn á vegum Rauða krossins halda til Haítí á mánudaginn.

Þau Erla Svava Sigurðardóttir hjúkrunarfræðingur og Jón Magnús Kristinsson bráðalæknir munu starfa næstu vikur á sjúkrahúsi finnska og þýska Rauða krossins í Carrefour, úthverfi Port-au-Prince. Þau eru 26. og 27. í röðinni af sendifulltrúum Rauða kross Íslands sem haldið hafa til starfa á Haítí síðan jarðskjálftinn mikli reið þar yfir fyrir rúmu hálfu ári.

Fyrir eru sex hjálparstarfsmenn á vegum Rauða kross Íslands á jarðskjálftasvæðinu. Þrír halda til Íslands í lok næstu viku. Þær Oddfríður Ragnheiður Þórisdóttir og Kristjana Þorláksdóttir hjúkrunarfræðingar halda hins vegar áfram störfum á finnsk/þýska sjúkrahúsinu út ágúst, samkvæmt upplýsingum frá Rauða krossinum.