Arnarverk bauð lægst í breikkun Suðurlandsvegar

Verktakafyrirtækið Arnarverk ehf í Kópavogi bauð lægst í breikkun Suðurlandsvegar, en tilboð voru opnuð í dag. Alls bárust um 15 tilboð í áfangann. Um er að ræða tvöföldun og breikkun Hringvegar frá Fossvöllum í Lögbergsbrekku, ofan við Lækjarbotna, að Draugahlíðabrekku austan við Litlu kaffistofuna.

Arnarverk bauð rúmlega 606 milljónir króna sem er um 81 prósent af áætluðum verktakakostnaði. Næstlægst var Vélaleiga AÞ, ehf og síðan Háfell ehf.

Í frétt á vef Vegagerðarinnar kemur fram að áætlaður verktakakostnaður sé einungis hluti af kostnaði við verkið. Við bætist til dæmis eftirlit og umsjón, malbik og víravegrið þannig að heildarkostnaður verði töluvert hærri.