Má selja eignir til að standa undir lögfræðikostnaði

Slitastjórn Glitnis hefur veitt Jóni Ásgeiri Jóhannessyni leyfi til að selja þær eignir sem hann þarf til að standa undir lögfræðikostnaði vegna málaferla og daglegum útgjöldum. Jón Ásgeir segist ekki sjá hvaða kröfuhafar Glitnis eigi að græða á aðgerðum slitastjórnar gegn honum.

Slitastjórn Glitnis fékk í gær úrskurð hjá dómara í London um kyrrsetningu á hundrað milljónum króna sem Jón Ásgeir millifærði af reikningi sínum daginn eftir að alþjóðleg kyrrsetning á eignum hans tók gildi. Peningarnir fóru til tveggja viðskiptafélaga hans og fyrirtækja tengdum þeim. Jón Ásgeir segist hafa verið að greiða skuldir. Greiðslubeiðnin hafi verið lögð fram nokkrum dögum fyrir kyrrsetningu.

„...og það tekur einn til þrjá daga í Bretlandi að láta greiðslur ganga eftir og það kemur bersýnilega í ljós að ef reikningurinn hefði verið frosinn hefði ekki verið hægt að millifæra af honum, svo einfalt er það," segir Jón Ásgeir.

Formaður slitastjórnar Glitnis sagði í samtali við fréttastofu að Jón Ásgeir gæti átt yfir höfði sér fangelsisvist vegna brots á kyrrsetningarúrskurði og verið sé að kanna hvort ástæða sé til að beita frekari viðurlögum.

„Það er ekkert slíkt í kortunum og ég hef undir höndum yfirlýsingu frá lögmönnum Glitnis, eftir að hún hélt þessu fram í Fréttablaðinu í morgun og þeir segja að ekkert slíkt sé í farvatninu," segir Jón.

Fréttastofa hefur undir höndum afrit af tölvupósti frá lögmanni hjá bresku stofunni Slaughter&May sem starfar fyrir slitastjórn Glitnis sem staðfestir þessi orð.

Slitastjórnin hefur veitt Jóni Ásgeiri leyfi til að selja eignir til að standa undir lögfræðikostnaði og daglegum útgjöldum.

„Maður spyr sig hvað er skilanefndin í raun að fá út úr þessu, eða kröfuhafar Glitnis, ef ég má eyða öllum eignum í það að verja mig, sem mun örugglega verða niðurstaðan," segir Jón Ásgeir.

Ingibjörg Pálmadóttir, eiginkona Jóns Ásgeirs, er stærsti hluthafinn í 365 miðlum sem eiga og reka fréttastofu Stöðvar 2.