Síðasta verk Kristjáns Möller: Veitti herfyrirtækinu ECA leyfi

Kristján L. Möller, sem samgöngu- og sveitastjórnarráðherra, veitti flugmálastjóra heimild til að hefja undirbúning á skráningu loftfara fyrir hollenska fyrirtækið ECA Program Limited hér á landi. Kristjáni var skipt út úr ríkisstjórninni fyrr í dag.

Tilkynnt var um veitingu heimildarinnar á vef samgöngu- og sveitastjórnarráðuneytisins fyrir stundu. Þar er ákvörðunin rökstudd með eftirfarandi hætti:

„Undanfarið hefur átt sér stað mikil vinna og gagnaöflun í samgöngu- og sveitastjórnarráðuneytinu varðandi starfsemi ECA. Eftir mikla yfirlegu og rannsóknarvinnu var ákveðið að veita Flugmálastjórn Íslands heimild til að hefja undirbúning að skráningu loftfaranna hér á landi.

Á Suðurnesjum er eitt mesta atvinnuleysi á landinu og afar brýnt að ný verkefni sem skapað geta atvinnu á svæðinu verði að veruleika sem fyrst. Þessi starfsemi á að geta skapað allt að 150 störf til lengri tíma en um 200 störf á uppbyggingartímanum sem gæti hafist strax á þessu ári þó að ekki verði búið að ljúka við reglugerðarbreytingu áður."