Ingibjörg Sólrún flaug með þotu Kristínar

Ingibjörg Sólrún Gísladóttir, þáverandi utanríkisráðherra og formaður Samfylkingarinnar, flaug í einkaþotu á vegum Kristínar Ólafsdóttur, eiginkonu Björgólfs Thors Björgólfssonar, milli Barbados og Jamaíka í mars 2008. „Mér fannst þetta ekki óeðlilegt þá og mér finnst það ekki óeðlilegt nú," segir Ingibjörg Sólrún í DV sem fjallar um málið í dag.

Ingibjörg og Kristín sóttu ráðstefnu á Barbados um alþjóðlega samvinnu á sviði sjálfbærrar þróunar og fóru þaðan til Jamaíka til að kynna sér starfsemi UNIFEM, þróunarsjóð Sameinuðu þjóðanna fyrir konur. Ingibjörg fór á ráðstefnuna út af starfi sínu sem utanríkisráðherra en Kristín var yfir söfnunarátaki hér á landi þar sem safnað var í svokallaðan ofbeldissjóð UNIFEM.

Í samtali við DV segir Ingibjörg Sólrún að þetta hafi verið í eina skiptið sem hún hafi flogið með einkaþotu á vegum auðmanna á árunum fyrir bankahrunið. „Já, þetta var í eina skiptið."