Erlendir tjónabílar bannaðir

Óheimilt verður að skrá ökutæki hér á landi sem eru skráð sem tjónaökutæki erlendis, frá og með áramótum. Samgönguráðuneytið hefur beint þeim tilmælum til Umferðarstofu.

Umferðarstofa óskaði eftir umsögn ráðuneytisins um málið þar sem borið hefur á því að bíleigendur hafi keypt tjónabíla án vitundar um tjón sem þeir hafi orðið fyrir. Reglur um þessi mál eru túlkaðar mun rýmra en víðast er gert í nágrannalöndum okkar. Eigendurnir hafa svo staðið frammi fyrir alvarlegum göllum og skemmdum.

Í tilkynningu frá Umferðarstofu kemur fram að um áratugaskeið hafi það viðgengist á Íslandi að flytja inn tjónabíla, aðallega frá Bandaríkjunum. Bílarnir séu í flestum tilfellum óhæfir til endurskráningar í öðrum löndum. Eftir lágmarksviðgerðir hér á landi hafi þó gefist kostur á að skrá bílana til aksturs hér. Umferðarstofa óskaði því eftir umsögninni með tilliti til öryggiskrafna og neytendasjónarmiða. Nýjar vinnureglur verða kynntar af Umferðarstofu og munu þær taka gildi 1. janúar 2011. - þeb