Nýtt kvennaframboð til umræðu

Þórhildur Þorleifsdóttir, formaður jafnréttisráðs og fyrrum þingkona Kvennalista, er meðal frummælenda á Hitti Femínistafélags Íslands sem haldið verður í kvöld.

Efni Hittsins að þessu sinni verður spurningin um hvort nú sé tími fyrir nýtt kvennaframboð eða kvennalista í anda þeirra sem voru í upphafi síðustu aldar og á 9. og 10. áratugnum. Sú spurning hefur orðið áleitnari eftir efnahagshrunið.

Meðal spurninga sem velt verður upp eru: Hverjir eru kostir og gallar sérstaks kvennaframboðs? Hvers vegna lognaðist Kvennalistinn út af? Á nýtt kvennaframboð sér grundvöll árið 2010? Hvert væri hlutverk slíks framboðs og hvernig yrði það upp byggt?

Auk Þórhildar verða frummælendur Katrín Anna Guðmundsdóttir, fyrrum talskona Femínistafélagsins, og Elísabet Jökulsdóttir, rithöfundur.

Að loknum erindum verður boðið upp á spurningar og umræður.

Hittið verður að þessu sinni haldið í Friðarhúsi að Njálsgötu 87 milli 20 og 22 og er öllum opið.