Fyrsta degi sumars víða fagnað

Sumardagurinn fyrsti rann upp bjartur og fagur á höfuðborgarsvæðinu og víða um land þó víðsvegar væri nokkuð kalt. Á allmörgum stöðum verður þessu fyrsta degi sumars fagnað með skrúðgöngum og öðrum hátíðahöldum. Fjölskylduhátíðir verða í helstu hverfum Reykjavíkur í dag. Auk hverfahátíða verður barnamenningarhátíð í fullum gangi og þar er einnig að finna fjölbreytta dagskrá sem hægt að skoða hér.

Að vanda verða skátarnir áberandi í hátíðarhöldum dagsins og flest skátafélög landsins taka þátt. Klukkan 11 verður skátamessa í Hallgrímskirkju að viðstöddum Ólafi Ragnari Grímssyni forseta Íslands, verndara skátahreyfingarinnar. Prestur er séra Birgir Ásgeirsson. Skátakórinn leiðir sönginn og ræðumaður dagsins er Bragi Björnsson.