Mynd um von og afstöðu

„Kannski er þetta framtíðin, að láta myndir liggja ókeypis á Netinu. Okkur fannst bara að þessi mynd ætti að koma inn í umræðuna núna,“ segir Vera Sölvadóttir, sem gerði heimildarmyndina Burkino Faso 8600 km ásamt Þorsteini J. Myndina er nú hægt að horfa á ókeypis á slóðinni www.thorsteinnj.is.

Í myndinni fylgja kvikmyndagerðarmennirnir þeim Hinriki og Gullý frá Selfossi alla leið til Burkina Faso þar sem þau sjá um skólastarf á vegum ABC-hjálparsamtakanna.

„Þetta er mynd um von og það að taka afstöðu,“ segir Vera. „Þetta er efni sem snertir okkur í nútímanum. Burkina Faso er þriðja fátækasta land í heimi og því er varla hægt að bera landið saman við Ísland. Þessi mynd fær mann til að hugsa um stöðu sína á krepputímum. Hvað er kreppa? Þegar ég kom þarna var ég nýbúin að vera í brjálæðislegum vellystingum í Bandaríkjunum. Við vorum að kvarta yfir íslensku kreppunni og svo kemur maður þarna út og fólkið á bara ekki neitt. Ekki neitt. Maður fer að hugsa hvort þetta sé kannski bara eitthvert loft sem alltaf er verið að tala um á Íslandi. Auðvitað skiptir þetta máli sem við erum að kvarta yfir í kreppunni okkar, en þetta skiptir ekki máli upp á líf og dauða. Þegar búið var að segja fólkinu úti frá því að það væri kreppa á Íslandi fékk maður spurningar eins og hvort það væri nóg að borða handa öllum. Maður hálfpartinn skammaðist sín þegar maður var að svara. Þau skildu ekki alveg hvað við vorum að tala um.“

Kreppan á Íslandi hefur þó bein áhrif í miðri Afríku. „Það kom mér mest á óvart,“ segir Vera. „Hjálparsamtök eru fjármögnuð með íslenskum peningum og þegar krónan hrynur og allir gefa minna þá hefur þetta mikil áhrif. Það er gríðarlegt vonleysi þarna og ef barn kemst ekki í skóla eins og búið var að lofa hefur það mikil áhrif. Barn sem gengur í skóla getur bjargað heilli fjölskyldu af því það kann að lesa.“ - drg