Stjórnvöld hvött til að stöðva fyrirhugaðar stjórnkerfisbreytingar

Fjölmörg samtök í sjávarútvegi, landbúnaði, lax-og silungveiði hafa sent forsætisráðherra og fjármálaráðherra bréf vegna fyrirhugaðra stjórnkerfisbreytinga og áhrifum þeirra á verkefni sjávarútvegs- og landbúnaðarráðuneytisins.

Í bréfinu eru áhyggjur samtakanna af fyrirhuguðum breytingum sem hafa verið boðaðar á verkefnum ráðyuneytisins ítrekaðar og eru stjórnvöld hvött til þess að hverfa frá þeim. Þá er minnt á fund sem fulltrúar samtakanna áttu í forsætisráðuneytinu í september í fyrra en þar segja þau að þeim hafi verið lofað að stofnaður yrði sérstakur starfshópur um breytingarnar þegar þar að kæmi, með aðild hagsmunasamtaka.

Í minnisblaði sem lagt var fram á fundinum í september var bent á nauðsyn náinna tengsla á milli grunnstofnana og ráðuneyta til að tryggja að stjórnarathafnir byggi á faglegri ráðgjöf. „Ekkert samráð hafði þá verið við þá aðila sem málið varðar. Þá lágu ekki fyrir nein gögn um hagkvæmni eða forsendur fyrirhugaðra breytinga," segir í bréfinu.

„Á fundinum var því lýst af hálfu fulltrúa forsætisráðuneytisins að umrædd vinna væri skammt á veg komin og því heitið að stofnaður yrði starfshópur um verkefnið þegar þar að kæmi, með aðild hagsmunaðila," segir ennfremur.

„Með vísan til þess sem að framan greinir kemur það okkur algjörlega á óvart að ríkisstjórnin hyggist ljúka málinu með framlagningu lagafrumvarps á næstu dögum, eins og ráða má af fréttum, án nokkurs samráðs við hagsmunaaðila. Með því væri gengið á bak þeirra loforða sem okkur hafa verið gefin," segir að lokum um leið og óskir um faglega vinnu með aðkomu hagsmunaaðila eru ítrekaðar.

Við ítrekum óskir okkar um að málið verði unnið faglega með aðkomu þeirra sem það varðar.

Undir bréfið rita:

Bændasamtök Íslands

Farmanna- og fiskimannasamband Íslands

Landssamband íslenskra útvegsmanna

Landssamband smábátaeigenda

Landssamband stangaveiðifélaga

Landssamband veiðifélaga

Samtök atvinnulífsins

Samtök fiskvinnslustöðva

Sjómannasamband Íslands

VM- félag vélstjóra og málmtæknimanna