Solla og Vala í sjónvarpiðdag

Valgerður Matthíasdóttir og Sólveig Eiríksdóttir verða með vikulega uppskrift í Fréttablaðinu á fimmtudögum. Sólveig sýnir síðan réttu handtökin sama kvöld í Íslandi í dag á Stöð 2.

Völu Matt og Sollu þarf vart að kynna fyrir Íslendingum en saman hyggjast þær fræða Íslendinga um gómsæta og holla rétti sem allir ættu að geta gert á skjótan hátt. Hægt verður að sjá hvernig er rétt að bera sig að í sjónvarpsþættinum Ísland í dag og skoða upptökur inn á visir.is.

Vala bendir á að Solla sé að verða nokkuð þekkt erlendis meðal hráfæðis- og heilsuspekúlanta enda hefur hún verið í samstarfi við einn þekktasta hráfæðiskokk Ameríku. „Já, ég hef unnið með Angelu Stokes, en hún er orðin hálfgerð goðsögn í Ameríku eftir að það kom viðtal við hana á fréttastöðinni CNN og milljónir manna horfðu á hana segja frá því hvernig hún létti sig um rúm 72 kíló, hvorki meira né minna, og breytti algerlega um lífsstíl,“ útskýrir Sólveig og bætir því við að Stokes hafi einnig bætt heilsu sína með því einu að breyta mataræðinu. „Hún neytti einungis hráfæðis og fannst það algjör snilld að hún gat borðað eins mikið og hún vildi, hvenær sem hún vildi en hélt svo á sama tíma alltaf alveg sinni kjörþyngd. Og svo rúsínan í pylsuendanum, húðin á henni varð silkimjúk og slétt og glans kom í hárið. Hún fékk roða í kinnar og varð bara eins og ný manneskja,“ útskýrir Sólveig.

Vala segir fyrstu uppskriftina vera orkudrykk sem sé bæði ofboðslega góður og fljótlegur og alveg hrikalega flottur. „Þessi drykkur er eins og sælgæti á bragðið en á sama tíma hefur hann allt sem þú þarft úr morgunmat. Það er svo frábært að geta hent í hann hráefninu á nokkrum mínútum og drukkið svo á meðan verið er að gera sig til á morgnana,“ segir Sollu.

Að sögn Sollu er grunnurinn að drykknum nokkuð breytilegur því það sé hægt að breyta hráefninu eftir því hvað til er í skápunum. „Best er að allt sé lífrænt, ég hef til dæmis sem grunn banana og haframúslí sem er algjört sælgæti með súkkulaðibitum (eða tröllahafra). Svo set ég döðlur, möndlur og smá lífrænt kakó og stundum smá kókosmjöl. Þetta set ég allt í blandara og helli köldu vatni út í. Fólk ræður svo hvað það vill hafa drykkinn þykkan og setur vatn eftir því. Svo er gott að setja nokkra klaka í lokin.“

Vala segist hafa heyrt ótrúlega margar reynslusögur þar sem fólk lýsir því hvernig það hefur hreinlega bjargað lífi sínu og stundum jafnvel læknast af ýmsum kvillum með breyttu mataræði. „Það er magnað hvað holl fæða getur verið mikið töframeðal, bæði sem forvörn og lækning og svo bara sem dúndur orkugjafi.“