Segja leyndarhyggju stjórnvalda óásættanlega

Fulltrúar Framsóknarflokksins í efnahags- og skattanefnd og viðskiptanefnd hafa óskað eftir sameiginlegum fundi nefndanna vegna vinnubragða stjórnvalda er snerta gengistryggð lán. Að mati þingmannanna, Birkis Jón Jónssonar og Eyglóar Harðardóttur, verður að halda þennan fund án tafar. Vinnubrögð og leyndarhyggja stjórnvalda sé með öllu óásættanleg og verði að ræða ítarlega á vettvangi Alþingis. Þau vilja að Jónína S. Lárusdóttir fyrrverandi ráðuneytisstjóri í efnahags- og viðskiptaráðuneytinu og Sigríður Rafnar Pétursdóttir lögfræðingur frá sama ráðuneyti komi á fundinn.

„Þessar upplýsingar sem hluti stjórnsýslunnar og ríkisstjórnarinnar bjuggu yfir hefðu getað haft mikil áhrif á umræðu um skuldir heimila og jafnframt um stofnun hinna nýju banka," segir í tilkynningu Birkis og Eyglóar.

„Það er með öllu ólíðandi að ráðherra hafi ekki skýr svör um, á hverju ákvarðanir byggjast sem varða þegna landsins háum fjárhæðum. Er sérstaklega vísað til þess að enginn fyrirvari var gerður um lögmæti nefndra lána við stofnun svo kallaðra „nýju banka". Er óskiljanlegt að ráðherra, og aðrir þeir sem vitneskju höfðu um hugsanlegt ólögmæti, hafi látið undir höfuð leggjast að verja hagsmuni almennings, með því að gera fyrirvara um lögmæti þeirra við stofnun nýju bankanna."