Plata með Stórsveit

Sálin hans Jóns míns er að undirbúa nýja plötu með dyggri aðstoð Stórsveitar Reykjavíkur. Þessa dagana eru Sálverjar að skoða prufuupptökur á nýjum lögum og á fundi á næstunni verður kosið á milli þeirra. Nýjar prufuupptökur af þeim verða síðan teknar upp í hljóðveri. Að því loknu verða endanleg lög valin á plötuna, sem er væntanleg í haust.

Sálin verður dugleg við spilamennsku um páskana eins og svo oft áður. Sveitin mun troða upp í fjórum sveitarfélögum, Selfossi, Kópavogi, Akureyri og Keflavík, þar sem stemningin verður vafalítið gríðarlega góð.