Vill láta kanna þátttöku karla í fæðingarorlofi

Stefnt er að því að gera könnun á undirbúningi og þátttöku feðra í fæðingarorlofi. Auk þess verða könnuð áhrif fæðingarorlofs karla á verkskiptingu ungra foreldra.

Þetta kemur fram í þingsályktunartillögu um framkvæmdaáætlun í jafnréttismálum fyrir árin 2010-2014 sem félags- og tryggingamálaráðherra hefur undirbúið. Ráðherra vill að könnuð verði sérstaklega áhrif niðurskurðar á greiðslum úr fæðingarorlofssjóði á töku feðra á fæðingarorlofi.

Jafnréttisáætlunin er umfangsmikil. Hún er unnin í samráði við einstök ráðuneyti, Jafnréttisstofu og Jafnréttisráð. Einnig var við gerð hennar höfð hliðsjón af umræðum sem fram fóru á jafnréttisþingi sem haldið var í janúar 2009 og skýrslu um stöðu og þróun jafnréttismála sem var birt þegar þingið var haldið.