Íslenskur þjóðfundur veitir metsöluhöfundi innblástur

Kanadíski metsöluhöfundurinn Carl Honoré, höfundur bóka sem þýddar hafa verið á yfir þrjátíu tungumálum, ætlar að gera íslensku hugmyndinni um þjóðfund góð skil í nýjustu bók sinni. Honoré mætti að eigin frumkvæði á síðasta þjóðfund sóknaráætlunar fyrir Ísland, sem fjallaði um tækifæri fyrir Reykjavík og haldinn var í Rimaskóla í dag.

Markmið þjóðfundar í Reykjavík var að finna út hvernig mætti efla atvinnu- og verðmætasköpun í Reykjavík. Hundrað og tuttugu manns tóku þátt í þjóðfundinum sem var í Rimaskóla í dag og var þar blanda af einstaklingum úr úrtaki og öðrum sem voru gestir stöðu sinnar vegna.

Kanadíski metsöluhöfundurinn Carl Honoré, höfundar bókarinnar Lifðu lífinu hægar sem selst hefur í milljónum eintaka og verið þýdd á yfir þrjátíu tungumálum, var gestur á þjóðfundinum.

Honoré segir að hugmyndin um þjóðfund sé alveg ný fyrir sér. Hann segir að sér finnist merkilegt að óbreyttir borgarar geti hist og rætt hugmyndir með menntamálaráðherra, lögreglustjóranum og fleiri háttsettum. Honoré segir að hugmyndin gæti orðið fyrirmynd fyrir aðrar þjóðir sem vilji endurhugsa hugmyndir sínar um lýðræðið sjálft. Hann segist ekki þekkja nein fordæmi þess að hugmyndin hafi verið virkjuð með sama hætti neins staðar í heiminum og segir að hann muni skrifa um þjóðfundinn í Reykjavík í nýjustu bók sinni.