Mikil þörf fyrir aðstoð í Pakistan

Rauði krossinn kallar eftir tafarlausri aðstoð til Pakistans. Ekkert lát hefur verið á úrfellinu vegna monsúnrigninga í landinu og er nú um 70% af öllu landinu undir vatni, að því er fram kemur í tilkynningu frá Rauða krossi Íslands. Talið er að um 14 milljónir manna hafi orðið fyrir áföllum vegna flóðanna og að um 6 milljónir þurfi á tafarlausri aðstoð að halda eigi íbúar að lifa hamfarirnar af á næstu vikum. Þetta eru verstu flóð í sögu landsins.

Alþjóða Rauði krossinn kallar nú eftir enn meira fjármagni í neyðarbeiðni sína sem hljóðar upp á tvo milljarða íslenskra króna. Rauði kross Íslands hefur þegar sent 3,5 milljónir króna úr neyðarsjóðum sínum til hjálparstarfsins og hefur einnig opnað fyrir söfnunarsíma sinn 904-1500 fyrir þá sem vilja styrkja neyðaraðstoðina.

Múlasnar ferja hjálpargögn



Sjálfboðaliðar Rauða hálfmánans í Pakistan hafa lagt dag við nótt við dreifingu hjálpargagna síðan flóðin hófust og hafa þegar náð til um 100 þúsund íbúa. Fram kemur í tilkynningunni Rauði krossinn og Rauði hálfmáninn hafa notast við múlasna til að ferja hjálpargögn til einangraðra fjallaþorpa þar sem mjög víða er ófært á flóðasvæðunum. Þá hafa heilsugæslulið Rauða hálfmánans veitt um 30 þúsund manns í afskekktum héruðum læknisaðstoð.

Framkvæmdastjóri Alþjóða Rauða krossins, Bekele Geleta, kom til Pakistans í dag til að kynna sér ástandið í landinu og sýna Rauða hálfmánanum í Pakistan stuðning. Tæp fimm ár eru liðin frá jarðskjálftanum mikla í norðvesturhluta landsins, en þá þurftu milljónir manna á neyðaraðstoð að halda.

Söfnunarsími og hjálparsjóður

Rauði krossinn minnir á söfnunarsíma sinn 904-1500 fyrir þá sem vilja leggja hjálparstarfinu í Pakistan lið. Þegar hringt er í númerið bætast 1.500 krónur við næsta símreikning. Einnig er hægt er að styrkja hjálparstarf Rauða krossins með því að greiða inn á reikning hjálparsjóðs í banka 0342, hb. 26, reikn. 12, kt. 530269-2649.