Nani og Meireles í stuði á Tapasbarnum eftir leikinn

„Þeir voru mjög hressir og skemmtilegir," segir Bento Guerreiro, annar eigenda veitingastaðarins Tapasbarsins við Vesturgötu.

Portúgölsku landsliðsmennirnir Nani og Raul Meireles heilsuðu upp á starfsfólk Tapasbarsins eftir landsleik Íslands og Portúgals á þriðjudagskvöldið. Portúgalski hópurinn flaug til Lissabon eftir leikinn en Nani og Meireles, sem leika á Englandi, flugu ekki fyrr en í gærmorgun. Þeim gafst því stund milli stríða.

„Þeir borðuðu með landsliðinu eftir leikinn en komu svo til okkar þegar liðið var farið út á flugvöll," segir veitingamaðurinn Bento. Hann segir að þeir Tapas-menn séu vel tengdir og hafi verið búnir að tala við knattspyrnumennina áður og bjóða þeim til sín.

„Við erum tveir Portúgalar sem eigum staðinn, ég og Nuno, svo þetta var auðvitað mjög gaman fyrir okkur. Þetta var nú alls ekkert partí, þetta var bara starfsfólkið og nokkrir gestir sem fengu að sitja áfram og spjalla við þá. Þeir stoppuðu samt alveg í tvo tíma hjá okkur en drukku bara kók," segir Bento.

Var ekki kvenfólkið ánægt með að fá svona glæsilega menn í heimsókn?

„Ja, hvað heldur þú? Við vorum auðvitað ekkert að opna út á götu og auglýsa þetta, þetta var bara starfsfólkið hérna og þær kunna sig."

Nani spilar með Manchester United og Meireles spilar með Liverpool.

Rígurinn milli þeirra félaga var þó ekki sýnilegur í heimsókninni á Tapasbarinn. „Nei, alls ekki," segir Bento. „Það voru einhverjir sem héldu með Liverpool og sjálfur held ég meira að segja með Chelsea."

Heimsóknin mun setja svip sinn á Tapasbarinn til framtíðar. Þeir Nani og Meireles komu nefnilega færandi hendi. „Þeir komu með Real Madrid-treyju sem var árituð af Portúgölunum í liðinu - þeim Ronaldo, Pepe og Ricardo Carvalho. Við verðum ekki lengi að hengja hana upp á vegg hjá okkur," segir Bento Guerreiro, hæstánægður með heimsókn landa sinna.

hdm@frettabladid.is