Um 7000 manns mættir til Eyja - enn bætist í

Talið er að um 7000 manns hafi verið komnir til Vestmannaeyja í gærkvöld. Þá bættist stöðugt við í nótt og í morgun að mati lögreglunnar.

Sex fíkniefnamál komu upp hjá lögreglunni í gærkvöldi og í nótt. Í einu málinu voru haldlögð 8 grömm af nokkuð hreinu amfetamíni. Í hinum málunum var um að ræða minni skammta af kannabis og amfetamíni.

Þrír voru kærðir fyrir líkamsárásir og gistu þeir fangageymslu. Í einu tilfellinu nefbrotnaði aðili og í öðru hlaut dyravörður á „Húkkaraballinu" skurð eftir að gestur sló hann. Undir morgun voru fangageymslur lögreglunnar í Vestmannaeyjum fullar. Þá voru tveir ökumenn kærðir fyrir akstur undir áhrifum fíkniefna og var annar einnig undir áhrifum áfengis og að auki hafði hann verið sviptur ökuréttindum.

Þjóðhátíð sett í dagÞjóðhátíð í Vestmannaeyjum verður sett klukkan hálfþrjú í dag og gestir áfram að streyma til Eyja. Á áætlun Flugfélag Íslands eru 13 ferðir og þá verður loftbrú frá Bakkaflugvelli til Eyja. Herjólfur mun fara sjö ferðir framá næstu nótt og er fullbókað í allar ferðir, nema í ferð sem fer klukkan þrjú næstu nótt frá Landeyjahöfn.

Lögreglan vill hvetja foreldra til að brýna fyrir börnum sínum þeim hættur sem leynst geta á útihátíðum og telur að ungmenni yngri en 18 ára eigi þangað ekkert erindi nema í fylgd með fullorðnum. Á hátíðarsvæðinu verða starfsmenn félagsþjónustu Vestmannaeyjabæjar með vakt til grípa inní eða aðstoða ef ungmenni undir lögaldri eru á vergangi á hátíðinni.