Yfir eitt hundrað læra íslensku

Yfir hundrað nemendur frá Evrópu, Norður-Ameríku og Hong Kong læra nú íslensku hjá Háskólasetrinu á Vestfjörðum. Þetta er í þriðja skiptið sem námskeiðið er haldið.

Flestir nemendanna eru á leið í háskólanám hér á landi í haust og eru hér á Erasmus eða Nordplus skiptinemastyrkjum. Aðrir eru hér á eigin vegum, og nokkrir eru að hefja nám í haf- og strandsvæðastjórnun við Háskólasetrið í haust. Frá þessu er greint á heimasíðu Háskólasetursins. Stærstur hluti nemendanna gistir á Núpi í Dýrafirði meðan námskeiðið stendur yfir, í þrjár vikur.

Á námskeiðinu fá nemendurnir alhliða þjálfun í íslensku með fjölbreyttum og nútímalegum kennsluaðferðum. Mikil áhersla er lögð á samskiptafærni, svo nemendurnir geti notað tungumálið í daglegu lífi, að sögn Heiðrúnar Tryggvadóttur, verkefnastjóra hjá Háskólasetrinu. Þess vegna er bekkjarvinna, hópavinna og vettvangsvinna sameinuð í kennslunni.

Til þess að nemendurnir kynnist íslenskri menningu og samfélagi er einnig boðið upp á valnámskeið, allt frá dansi og kórsöng og yfir í málfræði og sögu. - þeb