Um 400 borgarstarfsmenn í Höfðatorgi

Starfsemi Reykjavíkurborgar hefur að miklu leyti fært aðsetur sitt í Höfðatorg. Fjöldi skrifstofa sem Reykjavíkurborg leigði víðs vegar um borgina hafa nú verið tæmdar og starfsemi þeirra komið fyrir undir einu þaki.

Ráðhúsið við Tjörnina er enn aðsetur um 70 starfsmanna, þar á meðal skrifstofu borgarstjóra og borgarstjórnar. Um 20 manns starfa í Tjarnargötu 12 sem hýsir meðal annars skrifstofur borgarfulltrúa.

Dagur B. Eggertsson, formaður borgarráðs, skrifaði undir húsaleigusamning á Höfðatorgi árið 2007 til 25 ára þegar hann sat í borgarstjórastól.

Samningurinn hljóðar upp á 38,2 milljónir á mánuði. Viðræður um endurskoðun á samningnum hafa verið samþykktar, en Dagur segir þó engin ákvæði vera í samningnum sem kveði á um endurskoðun.

Um 400 borgarstarfsmenn vinna í Höfðatorgi og segir Jón Halldór Jónasson, upplýsingafulltrúi framkvæmda- og eignasviðs Reykjavíkurborgar, að almenn ánægja ríki meðal stafsfólks á Höfðatorgi og sveigjanleiki vinnuaðstöðu sé mikill.

„Þetta eru góð og opin rými,“ segir hann. „Höfðatorg er mjög góður vinnustaður og aðstaðan eins og best er á kosið.“- sv