Sigurhátíð sama hvernig fer

„Við höldum sigurhátíð í Sjallanum á laugardagskvöldið sama hvernig fer,“ segir Valur Freyr Halldórsson, trommuleikari og söngvari Hvanndalsbræðra. Hljómsveitin flytur sem kunnugt er eitt laganna sex í úrslitum Söngvakeppninnar á laugardaginn. Það heitir Gleði og glens og er eina lagið í keppninni sem er sungið á íslensku.

Hvanndalsbræður eru sigurvissir. „Við fengum blóðbragð í munninn þegar við komumst í úrslitin. Við erum því ekkert með í þessu til að tapa,“ segir Valur. „Þetta er búið að vera svo rosalegt „plögg“ fyrir okkur að við verðum bara að fara alla leið. Það væri ekki ónýtt að vinna Eurovision. Röggi myndi reyndar detta niður dauður því honum finnst þetta svo fíflalegt. Okkur finnst það svo sem líka. Við erum komnir með stimpilinn á okkur og margir sem hafa fílað okkur lengi æla á okkur núna. Á móti eru krakkar og húsmæður farin að fíla okkur.“

Hljómsveitin hefur undirbúið sig af kostgæfni fyrir stóru stundina. „Við höfum farið í „body jam“-tíma hérna niðri í Átaki. Það eru svona konudanstímar. Á eftir höfum við farið í spa og fengið alls konar krem. Við breytum atriðinu lítið, stillum hljómsveitinni reyndar aðeins öðruvísi upp. Eina breytingin sem fólk mun sjá er að við verðum með ný bindi.“

Nú ganga ásakanir um að lögin sem Jógvan og Hera Björk syngja séu stolin og Hvanndalsbræður hafa lent í því sama. „Fréttablaðið Feykir.is í Skagafirði vill meina að lagið sé tvístolið. Við sendum það inn í óþökk Rögnvaldar og þeir slá því þannig upp að við höfum stolið því úr náttborðsskúffunni hans. Hann á svo að hafa stolið því frá sjálfum sér því lagið er svo líkt öðrum lögum sem hann hefur samið. Við erum pollrólegir yfir þessu. Eru ekki öll lög meira og minna stolin?“

Hvanndalsbræður fljúga norður strax að lokinni keppni. „Við förum í einkaþotu í boði Glitnis og Milestone og svo tekur bæjarstjórinn á móti okkur á flugvellinum,“ segir Valur.- drg