Sveppi í þrívíddartökum

Sveppi og félagar undirbúa nú gerð framhaldsmyndar í Algjörum Sveppa-flokknum. Næsta mynd verður tekin upp í þrívídd.

„Þetta eru prufutökur, tækin eru komin til landsins, speglakassinn og þrívíddarskjárinn, og við erum bara að fikra okkur áfram og athuga hvort mánuður sé nóg fyrir okkur,“ segir Sverrir Þór Sverrisson en hann ásamt Braga Þór Hinrikssyni eru byrjaður að fikta við þrívíddartæknina fyrir næstu myndina í Algjörum Sveppa-flokknum. Eins og Fréttablaðið hefur greint frá verður næsta mynd um Algjöran Sveppa tekin upp í þrívídd en fyrsta myndin sló eftirminnilega í gegn á síðasta ári.

Sverrir og Bragi hafa komið sér fyrir í myndveri Latabæjar í Garðabæ og ætla að prófa sig aðeins áfram. „Bragi er alveg með í maganum yfir þessu og er að reyna að láta þetta ganga upp. Við viljum gera þetta almennilega, fólk má ekki fá ofbirtu í augun því það er eitt að taka þetta upp og annað að koma þessu á hvíta tjaldið,“ segir Sverrir sem er þó hvergi banginn. „Kannski standa tökurnar yfir í þrjátíu daga og kannski þrjú hundruð daga. James Cameron var víst nokkur ár með eina þrívíddarmynd,“ segir Sveppi og vísar þar í Avatar-myndina.

Leikarinn segir þá vera eins og tvo litla stráka sem hafi fengið snemmbúna jólagjöf. „Við prófuðum að taka aðeins upp úti í garði í þrívídd og þetta leit alveg ótrúlega vel út,“ segir Sverrir en myndin mun heita Algjör Sveppi og dularfulla hótelherbergið. Vilhelm Anton Jónsson og Guðjón Davíð Karlsson endurtaka hlutverk sín frá fyrstu myndinni en við hópinn bætast þau Guðlaug Elísabet Ólafsdóttir og Þröstur Leó Gunnarsson. Auðunn Blöndal, sem hefur lengi gengið með leikaradrauminn í maganum, fær ekki hlutverk í þessari fyrstu þrívíddarmynd okkar Íslendinga.

„Nei, þetta er enginn fíflaskapur. Pétur Jóhann ætlar kannski að leika lítið hlutverk ef hann nennir,“ segir Sveppi.

freyrgigja@frettabladid.is